Ля 5-га форта вершы гучалі…


У 2019-м годзе ў межах акцыі “Лета з добрай кнігай” Брэсцкае абласное аддзяленне СПБ праводзіць шэраг акцый у музеях абласнога цэнтра

07.08.2019                                                          Новости


У 2019-м годзе, калі мы адзначаем 75-годдзе вызвалення Беларусі ад нямецка-фашысцкіх захопнікаў і 1000-годдзе Брэста, у межах акцыі “Лета з добрай кнігай”, Брэсцкае абласное аддзяленне Саюза пісьменнікаў Беларусі праводзіць шэраг акцый у музеях абласнога цэнтра.

Мерапрыемствы накіраваны на папулярызацыю творчасці пісьменнікаў Берасцейшчыны, духоўна-патрыятычнае выхаванне моладдзі, інфармаванне грамадскасці аб культурнай спадчыне нашай краіны. Сёлета абласны цэнтр аб'яўлены культурнай сталіцай Садружнасці, таму арганізатары мерапрыемстваў імкнуцца прыцягнуць увагу жыхароў Беларусі і гасцей да гістарычных аб’ектаў, памятных мясцін.

Другога жніўня пісьменнікі Брэсцкага абласнога аддзялення Саюза пісьменнікаў Беларусі атрымалі магчымасць пазнаёміцца з экспазіцыяй музея абароны Брэсцкай крэпасці “5-ы форт”. Яго навуковы супрацоўнік Сяргей Козак правёў займальную экскурсію, падчас якой пісьменнікі паглядзелі казарму, казематы, парахавыя скляпы, галерэі, зазірнулі ў байніцы, прайшліся з ліхтарамі па вузкіх калідорах у поўнай цемры, прагуляліся па жывапіснаму даху форта…

Напрыканцы экскурсіі брэсцкія пісьменнікі спыніліся ля сцен унікальнага помніка рускай фартыфікацыі, каб прачытаць свае паэтычныя радкі. Старшыня Брэсцкага абласнога аддзялення Саюза пісьменнікаў Беларусі Таццяна Дземідовіч, Заслужаны журналіст Рэспублікі Беларусь Георгій Тамашэвіч, паэт, празаік, перакладчык, драматург, лаўрэат Беларускай нацыянальнай літаратурнай прэміі Зінаіда Дудзюк, паэт, перакладчык член Саюза пісьменнікаў Беларусі і Расіі Любоў Красеўская і маладая паэтка Аксана Валуй гаварылі пра важнасць такіх сустрэч.

Яшчэ раз дакрануўшыся да гісторыі роднага горада і ваеннага мінулага, успамінаючы імёны тых, хто ў гады Вялікай Айчыннай вайны мужна абараняў родную зямлю, творцы падзяліліся сваімі планамі з музейнымі работнікамі і выказалі жаданне і надалей цесна супрацоўнічаць з музеем «Брэсцкая крэпасць-герой».

Прэс-служба Брэсцкага абласнога аддзялення Саюза пісьменнікаў Беларусі