Слова да роднай зямлі


У Кіраўску ў рамках Міжнароднага дня роднай мовы прайшлі сустрэчы з пісьменнікам-земляком Алесем Казекам

01.03.2020                                                         Новости 


21 лютага ў Кіраўску ў рамках Міжнароднага дня роднай мовы прайшлі сустрэчы з пісьменнікам-земляком Алесем Казекам, старшынёй Магілёўскага абласнога аддзялення грамадскага аб'яднання «Саюз пісьменнікаў Беларусі».

Алесь Казека ўраджэнец вёскі Новы Юзін Кіраўскага раёна. Піша на беларускай і рускай мовах. Аўтар зборнікаў вершаў «Перекрёстки судеб», «Души моей родник», «Мелодия надежды», «Единственный друг», «Час сяўбы», паэм «Медуніца», «Марыйка» і іншых. Акрамя таго яго вершы змешчаны ў шматлікіх калектыўных зборніках. З 2016 года з'яўляецца старшынёй Магілёўскага абласнога аддзялення грамадскага аб'яднання «Саюз пісьменнікаў Беларусі».

Падчас літаратурнай сустрэча «Слова да роднай зямлі», якая прайшла ў рамках адзінага дня інфармавання, Аляксандр Мікалаевіч пазнаёміўся з ідэолагамі, супрацоўнікамі культуры і адукацыі, жыхарамі раёна.

Літаратурная гасцёўня «Сэрца, якое належыць Беларусі» прайшла з навучэнцамі школ горада. Падчас размовы з дзецьмі Алесь Казека распавёў, што значыць Радзіма для яго, і спытаўся пра іх разуменне Радзімы. Вершы ў яго розныя: сумныя і гумарыстычныя, лірычныя і патрыятычныя. Аўтар прызнаўся, што яго любімай тэмай з’яўляецца восень – час сцішэння прыроды і яркіх фарбаў. Шмат ягоных вершаў зрабіліся песнямі ў творчым саюзе з магілёўскім кампазітарам М. А. Яцковым.

Абедзве сустрэчы прайшлі ва ўтульнай атмасферы. Падчас размовы падымаліся праблемныя пытанні роднай мовы і паэзіі. У ходзе сустрэчы прысутныя даведаліся пра цікавыя моманты з гісторыі жыцця паэта, пазнаёміліся са зборнікамі паэзіі творцы, праслухалі песні на яго словы.

Таксама быў прадэманстраваны запіс тэатралізацыі паэмы «Марыйка», пастаўленай падчас правядзення штогадовага жалобнага мітынгу-рэквіема ў вёсцы Боркі, дзе ў чэрвені 1942 года была праведзена буйная карная аперацыя фашыстаў супраць мірнага насельніцтва. Цяжкія ўспаміны Марыі Іосіфаўны Казека − маці паэта, ляглі ў аснову паэмы.

Такія сустрэчы вельмі карысныя і даюць магчымасць не толькі непасрэдна пазнаёміцца з творцам, але й даведацца пра яго адносіны да роднай мовы і Радзімы.

Марына ЦВЯТКОВА, дырэктар ДУК “Сетка бібліятэк Кіраўскага раёна”