24.11.2025 Новости
У межах раённага бібліятэчнага месячніка краязнаўства «Мой край дарагі, старонка мая», для ўдзельнікаў аматарскага аб'яднання «Спадчына» у Давыд-Гарадоцкай гарадской бібліятэцы адбылася сустрэча з Васілём Андрэевічам Казачком у фармаце паэтычнай гасцёўні пад назвай «Калі радок дыктуе пачуццё…».
На сустрэчу супрацоўнікі бібліятэкі запрасілі аднаго з самых вядомых і таленавітых людзей Століншчыны – паэта-земляка, члена Саюза пісьменнікаў Беларусі, дырэктара Цэнтра ганчарства ў вёсцы Гарадная, аўтара двух зборнікаў вершаў “Прызнанне” і “Я веру!” – Васіля Андрэевіча Казачка.Васіль Андрэевіч – той талент, што стаў гонарам не толькі столінскай зямлі, але і ўсёй Беларусі. Ён член Саюза майстроў народнай творчасці, лаўрэат спецыяльнай прэміі Прэзідэнта Рэспублікі Беларусь “За духоўнае адраджэнне” у галіне дэкаратыўна-прыкладнога мастацтва і проста чалавек з добрай, адкрытай і шчырай душой.
На пачатку сустрэчы паэт-ганчар распавёў пра сваё дзяцінства, юнацтва, пачатак творчага шляху. Захапіў гасцей гісторыяй роднага краю, падзяліўся і тым, што хвалюе сэрца паэта: стан беларускай мовы і будучыня не толькі роднай вёскі, але і ўсіх знікаючых вёсачак Беларусі. Пяшчотныя, прыгожыя радкі пра родную зямлю і яе краявіды гучалі ў выкананні аўтара на працягу ўсёй сустрэчы. Цераз паэзію Васіля Андрэевіча праходзіць прызнанне ў любові да сваёй малой радзімы, дарагой яго сэрцу Гарадной. Tэма кaxaння – yceaбдымнaя. Гэтa кpынiцa paдacцi i лeпшыx iмкнeнняў чaлaвeкa, пaчyццё бязмepнaй пaвaгi дa жaнчыны, яe xapacтвa, пpывaбнacцi, дyшэўнaй чыcцiнi. Таму каханню прысвечаны самыя душэўныя радкі паэта.
Васіль Андрэевіч чалавек шматгранны і захапляецца не толькі паэзіяй, але і жывапісам, маляваннем, ганчарствам. Аўтар расказаў пра шматвекавыя традыцыі ганчарнай справы, якія беражліва захоўваюць у вёсцы.
Удзельнікі гасцёўні дзяліліся ўражаннямі ад пачутых твораў, гаварылі пра малую радзіму, пра магчымасці кожнага дзеля захавання роднай мовы, культуры, народнага быту, звычаяў.
У канцы сустрэчы жадаючыя маглі атрымаць аўтограф і сфатаграфавацца з аўтарам. Мерапрыемства атрымалася па-сапраўднаму паэтычна-цёплым.
«Прыемна ўражаны не толькі прыродай славутых мясцін, але і гасціннасцю і ўвагай гэтых прыгожых людзей, што ганарацца сваёй гістарычнай і культурнай спадчынай і захоўваюць памяць аб вядомых земляках, — падкрэсліў пасля сустрэчы Васіль Казачок.
І нядаўна нарадзіліся ў паэта вершаваныя радкі-прысвячэнні!
Давыд-Гарадок
Азяблы асенні лісток
На шкле маёй “Шкоды” стыне.
Спяшаю ў Давыд-Гарадок,
Што кветкай расцвіў на Гарыні.
Узяў свой пачатак-выток
З далечы сівых стагоддзяў.
І, хоць ты ўсяго гарадок,
Нішто тваёй славе не шкодзіць.
На плошчы, у цэнтры самым, -
Давыд грозны з дзідай ў руках.
Калядныя “Конікі”, замак -
То слава Давыд-Гарадка!
Тут кветкам - раскоша і рай:
Цвітуць - аж гародам цесна!
Насенне ў нязведаны край
З “тыкеткамі” “едзе на вэсну”.
Была тут і прыстань калісьці.
Тавары плылі па свету.
Давыд-Гарадок - калыска
Пісьменнікаў слынных, паэтаў.
Што заўтра цябе чакае,
Зусім прадказаць не бяруся.
Ты годны, я цвёрда знаю,
Славутых мясцін Беларусі!
Спяшаецца часу плынь -
І вось я ўжо - на мосце…
Давыд-Гарадок, Гарынь,
Прымайце паэта ў госці!
18.11. 2025
Па інфармацыі Столінскай раённай бібліятэкі і Брэсцкага абласнога аддзялення
Саюза пісьменнікаў Беларусі
Больше новостей читайте в нашем телеграм-канале Союз писателей Беларуси