25.06.2026 Новости
Традыцыйная літаратурная імпрэза «Калі ты душою, як крэпасць над Бугам», прысвечаная Дню памяці і смутку ахвяр Вялкай Айчыннай вайны і генацыду беларускага народа прайшла на вуліцы Савецкай у Брэсце. Яе ўдзельнікі — брэсцкія пісьменнікі Зінаіда Дудзюк, Вера Вакула, Анатоль Брытун, Наталля Кандрашук, Анатоль Бензярук і творчая моладзь.
Са сцэны ўспаміналі, як пачаў стварацца мастацкі летапіс абароны Брэсцкай крэпасці, творчасць класікаў і паэтычнае балюча-горкае рэха на падзеі тых першых трагічных дзён беларускіх, рускіх, украінскіх, армянскіх, літоўскіх паэтаў. Да літаратурнага марафону далучыліся ўдзельнікі першага форума маладых майстроў слова — Ірына Макарчук, Марыя Наумчык, Кацярына Мізерыя, Аляксандра Кароль і юныя артысты, пераможцы абласнога конкурсу чытальнікаў «Зорны спеў», удзельнікі ўзорнага тэатра «Сторис». Маладыя паэты чыталі свае вершы, дзяліліся ўспамінамі бабуль і дзядуль, юныя дэкламатары прадставілі музычна-вершаваную кампазіцыю па творчасці старэйшага літаратара брэсцкай суполкі, чыё дзяцінства было апалена вайной, Георгія Тамашэвіча «Прыгажосць Брэстчыны», гучалі вершы столінскай паэткі Галіны Бабарыкі і ўрыўкі з твораў паэтаў-сучаснікаў.
Нечаканым і прыемным было выступленне кнігалюба Сяргея Матусевіча, які падзяліўся з гасцямі Брэста і землякамі сваімі ўражаннямі ад паездкі на родную Лунінеччыну. На малой Радзіме ён сустрэўся з Таццянай Канапацкай, складальнікам кнігі «Будь же навеки ты с миром повенчана, край православный — моя Лунинетчина». Перадача выдання брэсцкім пісьменнікам адбылася падчас мерапрыемства.
З тэматычнымі песнямі выступілі студэнтка эстэтычнага факультэта БДПУ ім. Танка Мілана Дземідовіч і салістка ўзорнага ансаблю «Тарарам» Брэсцкага абласнога цэнтра маладзёжнай творчасці Караліна Брыч.
Родны горад Брэст для людзей рознага пакалення стаў месцам першых адкрыццяў, шчырых прызнанняў і добрых падзей, але трагічны росчырк вайны ў душы кожнага пакінуў свой след. У застылых камянях і нашай памяці подзвіг герояў цытадэлі над Бугам бессмяротны.
Брэсцкае абласное аддзяленне
Саюза пісьменнікаў Беларусі
Больше новостей читайте в нашем телеграм-канале Союз писателей Беларуси